最近睇到一单新闻,话有商家推出一种“奇葩月饼”——酸菜月饼。

  恕小弟孤陋寡闻,酸菜鱼就听得多,“酸菜月饼”都系第一次听。小弟唔知呢种月饼系边位大师嘅“创意”,但觉得佢系喺度阿茂整饼——冇嗰样整嗰样。

  讲到月饼,唔怕俾人话“黄婆卖瓜”,小弟认为最好食嘅始终都系我哋嘅广式月饼。

  广式月饼嘅特点系皮薄馅靓,其中“馅靓”宁舍紧要。呢个“靓”,讲嘅系食材之间嘅巧妙搭配,产生味道“互动”嘅效果,比如,大家最熟悉嘅蛋黄莲蓉月,点解食起嚟甜得嚟又咸咸地,咸得嚟又甜甜地呢?因为佢将莲蓉同咸蛋结合,利用莲蓉嘅超甜、咸蛋嘅超咸,等佢哋互减甜咸、中和肥腻,咁样就产生咗咸甜适中、肥而不腻嘅第三种美味出嚟。

  讲番酸菜,佢虽然系腌制过嘅“旧菜”,但特点系要“热食”,比如佢搭配其他食材就可以做成酸菜鱼、酸菜牛肉、酸菜面等,佢喺当中起到吊味嘅作用。但如果用酸菜做月饼呢,咁就有啲难为佢啦,因为月饼属于糕点类嘅“冷食”,作为“热食”嘅酸菜又点样搭配成馅料呢?就算夹硬做成月饼馅料,味道酸眯眯,又边有月饼嗰种独有嘅香甜味道呢?

  传统食物通常有佢特定嘅食材,唔应该随便颠覆性改变,如果酸菜都可以做月饼,咁可唔可以做个蛋黄莲蓉鱼呢?

  更多甘肃热点资讯,欢迎扫描下方二维码关注新浪甘肃官方微博